أشتاقلك بالحيل ،، وأن شفتك أبطيت ؟
أحاول أسعى للوصل ، بي طريقه
وأن شفت زولك بين الأزوال ، فزيت
هذا شعوري ، كان تبغى الحقيقه
وأن مرت الأيام ، ياصاح وماجيت
ضاق النفس ، بالثانيه والدقيقه
كتبت فيك الشعر ، بيت(ن) ورى بيت
مير الشعر في غيبتك ، جف ريقه
خليتني مابين يمكن وياليت
وخليتني حتى الصبر ما أطيقه
وأذا نسيت الحب ، ولا تناسيت
معناتها ، شبتّ ، في قلبي حريقه
تدري وش أذكر ،، لاذكرت أنك أخطيت ؟؟
عاشق وطيب ، يستغله عشيقه
وتدري وش أذكر يوم فيني تسليت ؟؟
بأعظم صديق ، أللي غدربه صديقه
وتدري وش اشبه ،، لو في صدك تماديت ؟؟
أوفى رفيق ،، وينطعن من رفيقه
وأن كان عني ، ياحبيبي تخليت ؟
أسمع نحيب القلب ، وأسمع شهيقه
ليتك من أول حبنا ،، عني ماخفيت
أن الغدر ينتج ،، جروح(ن) عميقه
لا هزك الشوق لغرامي ، وحنيت ؟
لايامنا ،، والذكريات العتيقة؟
تذكر أنك أنت ،، بادي وقـفـّـيت
وخليتني مابين ‘‘ شرهه ،، وضيقه
فرصه وعدت منك ،، يومك تماديت
مشاعري حـُـــره ، وصارت طليقه
