اوجاع العراقيين
أظن كل ألبلاوي ألصارت ببغداد
إجتنا مسلفنه يا ناس من بره
اتصدگون عثمان وعمر راضين ؟
عن قتل الحسين و الزهره ؟
وياهو اليقتنع ان علي داحي الباب
على الصديق حاقد أو كسر ظهره ؟
يصفطون القوافي وسفه بعض الناس
ما حسبوا صراط الله شيعبـره ؟
الشِعِر مثل الزيوت ان صار عالنيران
يجي منه لهب قد يشعل الخضره
ويجي منه عطر لو كان فيه عطور
ويسعد الروح يومن يعجبك عطره
واذا فيه السموم يصير كالبركان
وعلى كل ألخلايق قد يعم شره
اكو بعض البشر تگله كش يطير
ويگطع ثدي أمه الچانت تبره
استغلوه الأجانب طمعوه بفلوس
وذبح حتى أبوه وباقي ألأسره
الوعي الديني ضعيف وقلة الأيمان
تفشت بالاوادم حيل منتشره
اشو من عشنا شفنا اقليم كردستان
بصلاح الدين عشنا ونعرف ألبصره
وشفنا أنبار تتنخى بأهل ذي قار
والموصل تنادي كربلا الحره
وشفنا أأسود بالحلة تدب عالموت
ورجال ألكوت ما فيهم من تبرا
وشبابك يا نجف تعبر على الكلفات
وما تر ضى لديالى العيشة المرّه
وعرفنا أهل ألسماوة رجال حد الموت
والتاريخ عندك هاك أخذ وأقرا
لتگلي الفتن هذي بنت بغداد
أو صارت بعد تفجير سامره
الفتن هذي وليدة ابن ذاك إبليس
ألعاند حتى ربه وما سجد لأمره
انتواعد يوم ربكم ينصب الميزان
وتجي جموع الكفر بالويل والحسره
ويجي حامل وزر شوف شكثر اطفال
وشكثر ناس انتهت من ناره الحمره
وهناك النبي هو المحامي يصير
ووين يروح من بچاها للسمره
ووين يروح من فرق عمر وحسين
اذا من يم محمد صارت العبره
واذا شفت الشرف بأرض العرب مفقود
ترى صوچ الكراسي انكسرت الجره
اذا تريدون عز ومفخرة وجنات
شمروا هالسواعد وادعموا ألثوره
لأن دين الله واحد ما يصير اثنين
ولأن الله عليم بما جرى ويجرى
وإذا المندس شكك بالجبوري اليوم
اضل آني الجبوري اليوم او بكره
ولك آني الجبوري يونس السلطان
أسكر بالقوافي بدون أي خمره
واضل ابن العراق وابن ذاك الهور
وما انساه ابد لمحمد الدره
ويضل غصباً عليك الوطن بالفرسان
عامر يا وضيع الشان يا عرّه
واليصعد الأوضاع بقاتل ومقتول
على حاله النجس لو بال أو خرّا
انا مضطر اكتب هالقصيدة الحين
وارجع خنجر الحاقد على ظهره
أظن كل ألبلاوي ألصارت ببغداد
إجتنا مسلفنه يا ناس من بره
