على جروحك ياوطن كاموا يركصون
لكن وحق نزفك مايظلون
العراق ايصير تابوت لو كال
ولو شعبك على طولك يموتون
مادام النهر يزكي الاراضي البيك
مثل طبع الشجر باجر يخضرون
وهانت ياوطن والجايه تهون
تحزم بالسعف واوكف على طولك
عراق انته وعليك اكلوب هاي الناس
اذا يخلص عمرهه اعمار يفدولك
وحق دجله وفرات وكل خضار الكاع
يظل عالي الجبل مرفوع بسهولك
فداك امي وابوي وعمري يا مهيوب
وفداك اجيال يا بو اجيال ضحولك
اسرج مهرتك واعبر على الكلفات
وخل سور المنايا يهاب لخيولك
يل شايل جرح ينزف عليك اسنين
حتى الموته فزوا فرض صلولك
انصاف الرجال اليوم يتحدوك
وقبل اليوم الف حساب حسبولك
انزف ياوطن غرك تراب الكاع
عندك شعب نشغة موت غنولك
راح النخل يحظن جبال اربيل
وشيعه وسنه فد ابهام بصمولك
من جرح الجرح وادري الظلام يحوم
وعلى طولك شمس باجر يفصلولك
كالوا منحني من صار بيه الصار
شما طالوا ابد ماصاروا بطولك
ذوله الونعم ما قصروا وياك
شوفولك ذهب وتراب باعولك
اتكاتف ياشعب وتحمل الصعبات
وسلموه العراق بايد مامونه
واكبر ياوطن لورادوا يحصدوك
الكصب يكبر تره كلما يحصدونه
راس الامه انته وتظل نبراس
وجسد هل امه ابد ما ينفع بدونه
اور واريدو واسمع الوركاء
تظن بجفوف ربنه الوطن يبنونه
